عرفان کریم: 
پێناچێت دەوڵەتانی سەرمایەداری لە ڕۆژئاوا بەسەرۆکایەتی ئەمریکا و هاوشانی حکومەتەکانی یەکێتی ئەوروپا، بیانەوێت تۆزێک ئابڕوی سیاسی بۆ خۆیان و ناوبانگی پڕ لەتاوانکاریان بگەرێیننەوە، هێشتا ئاسەوار و کاریگەریە نامرۆڤایەتیەکانی جەنگەکان، لە یوغسلافیا و عێراق و ئەفغانستان ولیبیا و سوریا، درێژەیان هەیە و ڕۆژانە ژیانی دەیان کەس دەکاتە قوربانی، ئەو جەنگانەی کە دەوڵەتانی ئەمریکا و وڵاتانی ئەندام لە یەکێتی ئەوروپا ئەنجامیان دا.ئەوەتانێ زۆر بێ شەرمانە هەمان سیاسەتی جەنگ و ماڵوێرانی درێژە پێدەدەن و بە تەواوی توانای سیاسی و سەربازیانەوە، پشتیوانی هێرشی وەحشیانەی دەوڵەتی ئیسرائیل دەکەن بۆ سەر دانیشتوانی فەلەستین لە غەزە.بیانۆی ئەمجارەشیان بۆ ئەم جەنگە کۆتایهێنانە بە تیرۆریزمی بزوتنەوەی حەماس لە فەلەستین.
ئەم کارە، بە ئاشکرا کردەوەیەکی دووڕوویی سیاسی و ئابڕووچونێکی گەورەیە، ئاخر کێ هەیە نەزانێ کەبە درێژایی ٧٠ ساڵی رابردوو و هەر لەسەرەتای دروستکردن و پێکهێنانی دەوڵەتی ئیسرائیلەوە، تیرۆر و تیرۆیزمی دەوڵەتی ئیسرائیل ، لەساڵی ١٩٤٨ ەوە درێژەی هەیە و بە شایەتی خودی ئەو چەندین بڕیار و بریارنامانەی کە لە ئەنجومەنی ئاسایشی نێودەوڵەتی ولە نەتەوە یەکگرتوەکان و لە پەرلەمانی ئەوروپاوە لە بەرامبەر پێشێلکاری و تاوانەکانی دەوڵەتی ئیسرائیل دەرکراون و بڕیاریان لەسەر دراوە.
بەڵام وەک دیارە، خۆگێلکردن لە ڕاستیەکان و داڕومانی ڕەوشتی سیاسی، ئەم دەوڵەتانە هەموو سنورێکی بەزاندبێت، هەروەک چۆن لەساڵی ١٩٩٦ لە بەرنامەیەکی تەلەفزیۆنیدا پرسیارێکیان لە مادلین ئۆلبرایت، وەزیری دەرەوەی ئەمریکا کرد، سەبارەت بەوەی کە گەمارۆی ئابوری بۆ سەر خەڵکی عێراق ، ئایا ئەم سیاسەتی گەمارۆدانە ئەو گرنگیەی هەبوو کە لە ئەنجامدا نزیکەی نیو ملیۆن منداڵ لە عێراقدا گیانیان لەدەستدا و ئەم ژمارەیە زیاترە لە ژمارەی ئەو منداڵانەی کە بە بۆمبی ئەتۆمی لە هیرۆشیما گیانیان لەدەستدا ؟ لەوەڵامدا ، گوتی بەڵێ ئەمە بڕیارێکی سەخت بوو بەڵام ئەوەی دەهێنا کە ئەنجامبدرێت.لەو ساڵاندا بە بیانۆی ئازادکردنی کوەیت لە ژێر دەسەڵاتی ڕژێمی بەعس، ئەم تاوانەیان ئەنجامدا. لە ئێستاشدا ، بەبیانۆی جەنگ دژ بە تیرۆریزمی ڕیکخراوی حەماس، دەیانەوێت سەدان هەزار خەڵکی سیڤیل بکوژن وبیانکەن بە قوربانی ئامانجە گلاوەکانی خۆیان ، کە تیایاندا منداڵ و ژن و کەسانی بەساڵاچوو و نەخۆش و کەمئەندام بوونیان هەیە.
پەردەپۆشکردنی سیاسەتی کوشتاری بە کۆمەڵی خەڵکی سیڤیل و بێ تاوان لە ژێر ناوی جەنگ دژ بە تیرۆر، یەکێک لە سیاسەتە نا ئینسانی و وەحشیگەریەکانی ئەم سەردەمەی دەوڵەتانی سەرمایەداری لە ڕۆژئاوا.هێشتنەی زۆڵم و ستەمی قەومی بەسەر خەڵکی فەلەستین و چارەسەرنەکردنی ئەم کێشەیە لە ٧٠ ساڵی ڕابوردودا، هۆکاری سەرەکی پەیدابوون و هەڵتۆقینی ڕیکخراوە تیرۆریستەکانە لە بابەتی حەماس و جیهاد و ئەلقەسامەکان.
بەواتایەکی دیکە، بەرپرسیاری سەرەکی لەم دۆخی جەنگە کە لەنێوان تیرۆریستی دەولەتی ئیسرائیل و ڕێکخراوە تیرۆریستەکانی سەر بە ئیسلامی سیاسی، خودی سیاسەتی فەرامۆشکردنی مافی خەڵکی فەلەستین لە دیاریکردنی چارەنوسی خۆی و هەروەها پشتیوانیکردنی کوێرانە لە دەوڵەتی کۆنەپەرستی ئیسرائیل.ئەو سیاسەتەی کە بەدرێژایی ٧٠ ساڵە درێژەی هەیە و لەلایەن ئەم دەوڵەتە سەرامەیەدارانەی ڕۆژئاواوە، پەیڕەوی لێدەکرێت.
بەرگرتن بەکوشتاری خەڵکی سیڤیل لە غەزە و ناوچەکانی دیکەی فەلەستین وئیسرائیل ئەرکێکی ئینسانی و مرڤدۆستانەیە، ئەم جەنگە لە دژی خەڵکی فەلەستین و ئیسرائیلە.
دەوڵەتانی سەرمایەداری لە ڕۆژئاوا بە سەرکردایەتی ئەمریکا ، لە پێناو هێشتنەوەی هەژمون و باڵادەستی خۆیان لە ئاستی جیهانیدا، ئامادەن قێزوەنترین تاوان ئەنجام بدەن.
١٤-١٠-٢٠٢٣
