دەستەی داکۆکی لەمامۆستایان‌و فەرمانبەرانی ناڕازیی له‌په‌یامێكى به‌په‌له‌دا به‌رده‌وامبونى بایكۆت له‌لایه‌ن مامۆستایان‌و فه‌رمانبه‌رانه‌وه ڕاده‌گه‌یه‌نێت‌و ده‌شڵێت، “بەوەرگرتنی یەک موچە بایکۆت ناشکێنین‌و خۆپیشاندان سازدەکەین”.
له‌ڕاگه‌یه‌نراوێكى دەستەی داکۆکی لەمامۆستایان‌و فەرمانبەرانی ناڕازیدا هاتوه، “پەیامێکی پێویست‌و بەپەلە بۆ سەرجەم مامۆستایان‌و فەرمانبەران، ئاگاداربن بەوەرگرتنی یەک موچە بایکۆت ناشکێنین‌و بەردەوامین لەبایکۆتکردنی هۆڵەکانی خوێندن”.
له‌ڕاگه‌یه‌نراوه‌كه‌دا هاتوه، “لەگەڵ وەرگرتنی موچەیەک ڕۆژی دواتر لەبەردەم پەروەردەی سەرجەم شارەکان خۆپیشاندان سازدەکەین”.
هه‌روه‌ك جه‌ختیشده‌كاته‌وه، “وەرگرتنی موچەی مانگه‌كانى 7و 8 پێکەوە، لەگەڵ دابەشکردنی هەر موچەیەک لەکاتی خۆیدا، زامنی کردنەوەی دەرگای قوتابخانەکانە”.
ئه‌مه‌ش له‌كاتێكدایه فه‌رمانبه‌ران‌و مامۆستایان له‌شاره‌كانى خواروو ناوه‌ڕاست موچه‌ى مانگى 9ى 2023 وه‌رده‌گرن، به‌ڵام له‌هه‌رێمى كوردستان ته‌نها موچه‌ى مانگى 6یان وه‌رگرتوه‌و تائێستاش دیارنییه موچه‌ى مانگى 7 كه‌ى دابه‌شده‌كرێت، له‌كاتێكدا مانگى 9ش ته‌نها 10 ڕۆژى ماوه.
سەرچاوە: شارپرێس
