ئەمڕۆ بەرواری 2023-09-14، میدیاكانی په‌كه‌كه رایده‌گه‌یه‌نن: ”چەکدارانی پارتی دوێنێ بە ٢٠٠ ئۆتۆمبێلی زرێپۆشەوە ڕوویانکردووەتە سیدەکان سەرلەبەیانی ئەمڕۆ هێرشیان کردە سەر سەنگەرەکانی گەریلا، لە ئەنجامی بەرپەرچدانەوەی گەریلاکان شەڕ هاتە ئاراوە و ئاڵۆزییەکە تا ئێستاش بەردەوامە”.
هاوپشتی: ئێوارەی دوێنێ چەکدارانی پارتی بە ٢٠٠ ئۆتۆمبێل و کەلوپەلی سەربازییەوە کە زرێپۆش و تانکیشیان تێدا بوو، گواسترانەوە بۆ ناوچەی سیدەکانی سەر بە هەرێمی برادۆست.
سەرچاوە هەرێمییەکان به میدیاكانی په‌كه‌كه‌یان ڕاگەیاند، ”سەرلەبەیانی ئەمڕۆ کاتژمێر ٠٤:٣٠ بەشێک لەو چەکدارانەی پارتی لە گەورووی زینێ لە گۆڕەپانی گۆشین هێرشیان کردووەتە سەر گەریلاکانی په‌كه‌كه و لە ئەنجامی بەرپەرچدانەوەیان لەلایەن گەریلاوە، شەڕ هاتووەتە ئاراوە”.
ئەو سەرچاوانە راشیانگەیاند، کە تا ئێستا ئاڵۆزی و گرژییەکان بەردەوامن.
