12
ئێوە كێ بوون ؟
سرووشت تان فێری جوانی و
چیا تان فێری سەوزبوون و
چرۆتان فێری پەل هاوێشتن و
گژوگیاتان فێری ڕەگ داکوتان کرد.
ئێوە کێ بوون؟
شاخ تان فێری خۆڕاگری و
بەرد تان فێری ڕاوەستان و
دارستان تان فێری یەکبوون و
پێدەشتەکانتان فێری ڕابوون کرد.
ئێوە کێ بوون؟
تفەنگتان فێری شکاندن و
کەڵ تان فێری سەربەستی و
ئاگرتان فێری دامرکان و
شار تان فێری شاخ کرد
ئێوە کێ بوون؟
منداڵتان فێری ژینگە و
قوتابخانەتان فێری پەروەردە و
زانکۆتان فێری پێشکەوتن و
کۆمەڵگاتان فیری نیشتمانپەروەری کرد.
ئێوە کێ بوون؟
کانیاوتان فێری ئاوەدانی و
چەم تان فێری ڕووبار و
ڕووبارتان فێری دەریا و
دەریا تان فێری ئارامی کرد.
ئێوە کێ بوون؟
بوومەلەرزەتان فێری سڕبوون و
ئاوارەییتان فێری نیشتەجێبوون و
شەقامتان فێری بەهانا چوون و
یارمەتیتان فێری کولتوور کرد
ئێوە کێ بوون؟
سۆزتان فێری خۆشەویستی و
تۆلەتان فێری بەخشین و
کینەتان فێڕی لێبووردن و
زەردەخەنەتان فێری پێکەنین کرد.
ئێوە کێ بوون؟
برینتان فێری ساڕێژ و
دەردتان فێری دەرمان و
قەتیسمانتان فێری جووڵان و
جووڵانتان فێری جەماوەر کرد
ئێوە کێ بوون؟
هەڵوێستتان فێری کردەوەو
کۆیلەبوونتان فێری ئازادی و
جەماوەرتان فێری نەبەزین و
ستەم تان فێری سەرشۆڕی کرد.
ئێوە كێ بوون؟
دایکانتان فێری نەگریان و
هەڤاڵانتان فێری یەکبوون و
سەروەریتان فێری گەل و
مێژوو تان فێری ڕاستگۆیی کرد
ئێوە کێ بوون؟
چیاتان فێری سەربەرزی و
ئومێد بوونتان فێری جەماوەر و
شەریف بوونتان فێری ئاپۆڕا و
قەتیسمانتان فێری نەیاران کرد
“جەلال سەعید زادە”
